လူသားအားလုံးအတွက် အမြဲတစေ အနှောင့်အယှက်ပေးနေသော ဆေးဝါးအတုအပလုပ်ငန်းများ နိဂုံးချုပ်သွားစေရန်နှင့် ပြည်သူလူထုအားလုံး၏ ကျန်းမာရေးကို ရှေးရှုပြီး BPI ဆေးဝါးများအား အတုပြုလုပ်၍ ရောင်းချ ဖြန့်ဖြူးနေသူများကို စက်မှုဝန်ကြီးဌာနနှင့် သက်ဆိုင်ရာအဖွဲ့အစည်းများက ပူးပေါင်း၍ ဖော်ထုတ်အရေးယူမှုနှင့်စပ်လျဉ်းသည့် သတင်းစာရှင်းလင်းပွဲကို ယနေ့နံနက်ပိုင်းက နေပြည်တော်ရှိ စက်မှုဝန်ကြီးဌာန၌ ကျင်းပခဲ့သည်။

ဆေးဝါးစက်ရုံ(အင်းစိန်) ယခင် BPI စက်ရုံသည် ဆေးဝါးအမယ်သစ်များ တိုးချဲ့ထုတ်သွားရန်အတွက် ဈေးကွက်သုတေသနပြုလုပ်စဉ် ဈေးကွက်အတွင်း မသင်္ကာဖွယ်ဆေးဝါးအတုများကို သတိပြုမိခဲ့ပြီး စုံစမ်းခဲ့ရာ BPI စက်ရုံထုတ်ဆေးဝါးများကို အတုအပပြုလုပ်ပြီး ဖြန့်ဖြူးရောင်းချနေကြောင်း သိရှိရသည့်အတွက် သြဂုတ် ၃၁ ရက်မှစ၍ ပြည်ထဲရေးဝန်ကြီးဌာန၊ ကျန်းမာရေးနှင့် အားကစားဝန်ကြီးဌာနကြီးကြပ်မှုအောက်ရှိ အစားအသောက်နှင့် ဆေးဝါးကွပ်ကဲရေးဦးစီးဌာနတို့ ပူးပေါင်း၍ ရန်ကုန်တိုင်းဒေသကြီးအတွင်းရှိ ဗိုလ်ချုပ်ဈေးနှင့် ရွှေပြည့်စုံဈေးတို့တွင် မသင်္ကာဖွယ်ဆေးဝါးအတုများကို ဖမ်းဆီးခဲ့ရာ ဆေးဝါးအတုမျိုးစုံ ၄၄ မျိုး၊ တံဆိပ်အတုစုစုပေါင်း ၁၈ မျိုး၊ သက်တမ်းလွန် ဆေးဝါး ၉၈ မျိုးနှင့် သံသယဖြစ်ဖွယ်ဆေးဝါး ၂၁ မျိုးတို့ သိုလှောင်ထားခြင်း နှင့် ဆေးဝါးတံဆိပ်အတုများပြုလုပ်ရာတွင် အသုံးပြုသော ဖလင်ပြားများနှင့် ဆေးဝါးအတုပြုလုပ်ရာတွင် အသုံးပြုသော ကုန်ကြမ်းများဖြစ်သည့် Gripe Mixture သောက်ဆေးရည်အတု၊ Glucose ဆေးမှုန့်အတုနှင့် အရက်ပြင်းများကို သိမ်းဆည်းရရှိခဲ့သည်။ ဆေးဝါးအတုနှင့် သက်တမ်းလွန်ဆေးဝါးများ စုစုပေါင်း တန်ဖိုးငွေကျပ် ၂ ဒသမ ၈ဝ၇ ဘီလီယံဖိုး သိမ်းဆည်းရမိခဲ့ကြောင်း သိရသည်။

BPI သက်တမ်းလွန်ဆေးဝါးများ အများဆုံးသိမ်းဆည်းရမိခြင်းနှင့် ပတ်သက်ပြီး စက်မှုဝန်ကြီးဌာန အမြဲတမ်းအတွင်းဝန် ဦးကိုကိုလွင်က ''BPI ဆေးဝါးနဲ့ပတ်သက်ပြီး သူ့ရဲ့သက်တမ်းကို ဆေးရဲ့အမျိုးအစားအလိုက် ကျွန်တော်တို့ အများဆုံး သုံးနှစ်အထိ ပေးပါတယ်။ သက်တမ်းလွန်သွားရတဲ့ အကြောင်းရင်းကတော့ ရောင်းချတဲ့သူတွေအနေနဲ့ ပျံ့ပျံ့နှံ့နှံ့ မရောင်းနိုင်ဘူး။ အဲဒီလိုဖြစ်တဲ့အခါ ရောင်းချရန် သိုလှောင်ထားတဲ့ ဆေးဝါးပစ္စည်းတွေဟာ သက်တမ်းလွန်သွားတာတွေရှိတယ်။ ဥပမာ ရွှေစကား ဆေးဝါးရောင်းဝယ်ရေးကုမ္ပဏီဟာဆိုရင် အရင်က ကျွန်တော်တို့ BPI ဆေးဝါးစက်ရုံရဲ့ တစ်ဦးတည်းကိုယ်စားလှယ်ရယူထားတဲ့ ကုမ္ပဏီဖြစ်ပါတယ်။ ဒါကြောင့် သူဟာ ဆေးဝါးတွေကို ပျံ့ပျံ့နှံ့နှံ့ မရောင်းနိုင်ပါဘူး။ အဲဒီအချိန်မှာပဲ ဆေးဝါးအတုတွေဟာ ဈေးကွက်ထဲကို ဈေးနှုန်းသက်သာစွာနဲ့ ဝင်လာတဲ့အတွက် သူ့အနေနဲ့ စီးပွားရေးတွက်ခြေမကိုက်ဘူး။ နောက်ပြီး ဆေးတွေမရောင်းရတဲ့ အတွက် သူသိုလှောင်းထားတဲ့ ဆေးဝါးတွေဟာ သက်တမ်းလွန်သွားပါတယ်။ သူ ဒါကိုတော့ ထိန်းသိမ်းထားတယ်။ အဲဒီအပေါ်မှာ ဘယ်လိုဆောင်ရွက်မလဲ ဆိုတာကတော့ အခုမှသိရတဲ့အတွက် ကျွန်တော်တို့ စစ်ဆေးဖော်ထုတ်သွားမှာ ဖြစ်ပါတယ်။ နောက်ပြီး သူတို့အနေနဲ့ ဆေးဝါးဥပဒေပါပြဋ္ဌာန်းချက်တွေ ကို သိရှိနားလည်ဖို့လိုပါတယ်။ မသိလို့ လုပ်မိတယ်ဆိုပေမယ့် ဥပဒေအရတော့ ခွင့်လွှတ်မှာမဟုတ်ပါဘူး။ ထိုက်သင့်တဲ့ အရေးယူမှုတော့ ခံယူရမှာဖြစ်ပါတယ်။ နောက်ပိုင်းမှာ ဒီလိုမဖြစ်အောင်လည်း အခုဆိုရင် ဆေးဝါးအရောင်းကိုယ်စားလှယ်ကြီးတွေ ငါးဦးအထိပေးထားပါတယ်။ သူတို့ကိုလည်း ဥပဒေအတိုင်းလုပ်ပါ။ အခက်အခဲတွေရှိရင်လည်း ကျွန်တော်တို့နဲ့ ပူးပေါင်းဆောင် ရွက်ပေးပါဆိုပြီး ရှင်းပြထားပါတယ်။ အရောင်းကိုယ်စားလှယ်တွေအနေနဲ့ ဆေးဝါးတွေ သက်တမ်းကုန်ပြီဆိုရင် သက်ဆိုင်ရာ ဆေးဝါးကုမ္ပဏီတွေကို ချက်ချင်းအကြောင်းကြားပြီး ဖျက်ဆီးဖို့ ပြောရပါမယ်''ဟု ၎င်း၏ အမြင်ကို ပြောသည်။

''အဓိက ဒီ BPI ဆေးဝါးအတုတွေကို စက်မှုဝန်ကြီးဌာန BPI ဆေးဝါး စက်ရုံနဲ့ ပြည်ထဲရေးဝန်ကြီးဌာန အထူးစုံစမ်းစစ်ဆေးရေးဦးစီးဌာနတို့ ပူးပေါင်း ပြီးတော့ ဖမ်းဆီးတာဖြစ်ပါတယ်။ ကျွန်တော်တို့အစားအသောက်နဲ့ ဆေးဝါး ကွပ်ကဲရေးဦးစီးဌာနအနေနဲ့ကတော့ သူတို့ဖမ်းဆီးရမိတဲ့ ဆေးဝါးတွေကို ကျွန်တော်တို့ဆီကို နမူနာပို့တယ်။ အဲဒီနမူနာကို သုံးမျိုးစစ်ဆေးပါတယ်။ ပထမဦးဆုံးတစ်မျိုးအနေနဲ့ မျက်မြင်နဲ့ စစ်ဆေးတယ်။ နောက်ဓာတ်ခွဲစစ်ဆေး တယ်။ ဓာတ်ခွဲစစ်ဆေးတဲ့နေရာမှာလည်း BPI ဆေးဝါးစက်ရုံမှာရှိတဲ့ Retain Sample လို့ခေါ်တဲ့ အရန်ဆေးဝါးတွေနဲ့ တိုက်ဆိုင်စစ်ဆေးကာ Quality Control Lab တွေနဲ့ ဓာတ်ခွဲစစ်ဆေးပါတယ်။ ဆေးဝါးအတုတွေဖော်ထုတ်တဲ့ နေရာမှာ စက်မှုဝန်ကြီးဌာန အထူးစုံစမ်းစစ်ဆေးရေး ဦးစီးဌာနတွေနဲ့ ပူးပေါင်း ပြီးတော့ ဆောင်ရွက်ခဲ့ပါတယ်။ ဒီပွဲအနေနဲ့ ကျွန်တော်တို့ကတော့ စက်မှုဝန်ကြီးဌာနကို ပူးပေါင်းကူညီတဲ့သဘောပါပဲ။ FDA အနေနဲ့ကတော့ ဆေးဝါးအတုတွေ၊ စံမညီဆေးဝါးတွေ၊ ရောနှောဆေးဝါးတွေ၊ သက်တမ်းလွန်ဆေးဝါးတွေ အဲဒါတွေကို ထိန်းချုပ်နေတာပါပဲ။ ဒါပေမယ့် FDA တစ်ခုတည်းတင်မဟုတ်ဘဲ နဲ့ မိမိသက်ဆိုင်ရာ ကုမ္ပဏီတွေအနေနဲ့လည်း မိမိဆေးဝါးတွေကို ဖြန့်ဖြူး ပြီးပြီဆိုတာနဲ့ ဈေးကွက်ထဲကို ဆင်းသင့်ပါတယ်။ ကိုယ်ထုတ်လိုက်တဲ့ ဆေးဝါး တစ်ခုဟာ အတုဖြစ်နေလား၊ မဖြစ်ဘူးလားဆိုတာကို မိမိကိုယ်တိုင်လည်း သိသင့်ပါတယ်။ ကိုယ့်ရဲ့ပစ္စည်းကို ဈေးကွက်ထဲမှာ လေ့လာပြီးတော့ အတုဆိုရင် ကျွန်တော်တို့ဆီ ပို့ပြီးတော့ စစ်ဆေးခွင့်ရှိပါတယ်။ ၎င်းတို့ကိုယ်တိုင်လည်း တရားစွဲဆိုခွင့်ရှိပါတယ်။ အဲဒါမျိုးလေးတွေတော့ အကြံပေးချင်ပါတယ်''ဟု အစားအသောက်နှင့် ဆေးဝါးထုတ်လုပ်ရေးဦးစီးဌာန လက်ထောက်ညွှန်ကြား ရေးမှူး ဒေါက်တာဥက္ကာဖြိုးက ပြောသည်။

ဆေးဝါးအတုအပများ ဈေးကွက်အတွင်းဝင်မလာစေရန်နှင့် ပတ်သက်၍ Medi-Tech Biz Co., Ltd. မှ Chairman and Founder ဒေါက်တာမင်းဇော် က ''ဆေးဝါးအတုဆိုတာကတော့ BPI ဆေးဝါးမှ မဟုတ်ပါဘူး။ ကျန်တဲ့ ဆေးဝါးတွေမှာလည်း အတုတွေရှိပါတယ်။ အခုအခါမှာတော့ BPI ဆေးဝါး ကုမ္ပဏီအနေနဲ့ အတုအပတွေကို ဖော်ထုတ်ပြီး လိုက်လံသိမ်းဆည်းတဲ့အတွက် နိုင်ငံတော်အတွက်ရော၊ ပြည်သူအတွက်ရော ကောင်းပါတယ်။ အဓိကကတော့ ပထမအချက်အနေနဲ့ ပြည်သူထူထုကို အန္တရာယ်ဖြစ်စေမယ့် ဆေးဝါးအတု တွေ ဈေးကွက်အတွင်း ဝင်မလာစေဖို့နဲ့ ဒုတိယအချက်ကတော့ BPI ရဲ့ Brand ကို ပိုမိုခိုင်မာအောင် ပြန်ပြီးတော့ မြှင့်တင်တဲ့သဘောပါ။ သောက်ဆေး၊ လူးဆေးကတော့ ဆေးဝါးအတုလုပ်ဖို့လွယ်ပြီး ထိုးဆေးကတော့ ခက်ပါတယ်။ ထိုးဆေးကျတော့ တခြားနိုင်ငံက ဝင်လာတဲ့ဆေးကို ဈေးပိုရအောင် BPI တံဆိပ်ကပ်လိုက်တယ်။ ဆေးဝါးအတုတွေ ဈေးကွက်အတွင်း ဝင်မလာဖို့ဆိုတာကတော့ သက်ဆိုင်ရာတွေအနေနဲ့ ပုံမှန်စစ်ဆေးဖို့လိုပါတယ်။ ပြည်သူလူထု အနေနဲ့ ဆေးဝါးအတုလို့သိပြီး မသင်္ကာဖြစ်ရင် သက်ဆိုင်ရာကို အကြောင်းကြားပြီး ပူးပေါင်းဆောင်ရွက်ပေးဖို့လိုပါတယ်။ သက်ဆိုင်ရာကလည်း ပြည်သူတွေ ဆက်သွယ်လို့ရမယ့် လမ်းကြောင်းတွေ ဖွင့်ပေးဖို့လိုပါတယ်။ နောက်ပြီး BPI ဆေးဝါးကုမ္ပဏီအနေနဲ့ BPI တံဆိပ်နဲ့ပတ်သက်ပြီး တစ်နှစ်ကို လေးကြိမ်လောက် စစ်ဆေးပြီး ကျွန်တော်တို့ တံဆိပ်ကတော့ ဒီလိုပုံစံမျိုးပါ။ ဆင်တူ ယိုးမှားတွေ သတိပြုပါဆိုပြီးတော့ ကြေညာသင့်ပါတယ်''ဟု ၎င်း၏ အမြင်ကို ပြောသည်။

''အခုလိုဆေးဝါးအတုတွေ သိမ်းဆည်းရမိခြင်းအားဖြင့် မြန်မာနိုင်ငံ အနေနဲ့လည်း အများကြီးကောင်းပါတယ်။ နိုင်ငံခြားကနေ အတုတွေ တင်သွင်းလာတာရှိတယ်။ ပြည်သူတွေကလည်း မသိတဲ့အတွက် အဲဒီအတုတွေကို သုံးဖြစ်တယ်။ အခုလိုသိရှိရတဲ့အတွက် အစိုးရအနေနဲ့လည်း နောက်ပိုင်းဆိုရင် ပစ္စည်းအစစ်တွေကို ပြည်သူတွေဆီကိုရောက်အောင် ပို့ပေးနိုင်မှာ ဖြစ်ပါတယ်။ ကျွန်တော်တို့ ကုမ္ပဏီတွေအနေနဲ့လည်း ဒီပစ္စည်းအစစ်တွေကို ဖြန့်ရတဲ့အတွက် အများကြီးဂုဏ်ယူမိပါတယ်။ ကျွန်တော်တို့ ကိုယ်စားလှယ်တွေကို ဝန်ကြီးဌာနအနေနဲ့ တင်ဒါခေါ်ပြီး ကုမ္ပဏီရဲ့ နားလည်တတ်ကျွမ်းတဲ့ အပေါ်မူတည်ပြီး ရွေးချယ်ပါတယ်။ ဆေးဝါးအတုတွေ ဈေးကွက်မှာ ရှိနေတယ်ဆိုတာကတော့ ပြည်သူတွေလည်း တချို့တော်တော်သိနေကြပါတယ်။ ဒါပေမယ့် အခု သေသေချာချာထိထိရောက်ရောက် အရေးယူတာတွေကိုတော့ အရင်တုန်းက မကြုံဖူးပါဘူး။ အခု ဒီကိစ္စနဲ့ပတ်သက်ပြီး သေသေချာချာ လုပ်လာတဲ့အတွက် ပိုပြီးတော့ကောင်းလာမယ်လို့ ထင်ပါတယ်။ ကျွန်တော်တို့ Bio Trust Myanmar အနေနဲ့ကတော့ အတတ်နိုင်ဆုံး ဒီဆေးဝါးတွေ နဲ့ပတ်သက်ပြီး တစ်နိုင်ငံလုံး ဆေးဝါးအစစ်အမှန်တွေ ပြည်သူတွေဆီ ရောက်အောင် ဖြန့်ပေးဖို့ သေသေချာချာစီစဉ်ဆောင်ရွက်နေပါတယ်''ဟု Bio Trust Myanmar Co., Ltd. မှ အထွေထွေမန်နေဂျာ ဦးမင်းဇော်ထွန်းက ပြောသည်။

စက်မှုဝန်ကြီးဌာနအနေဖြင့် သက်ဆိုင်ရာအဖွဲ့အစည်းများပူးပေါင်း၍ BPI ဆေးဝါးအတုပြုလုပ်ရောင်းချသူ ခုနစ်ဦး၊ ဆေးဝါးအတု ပြုလုပ်သူ လေးဦး၊ တံဆိပ်အတုပြုလုပ်သူ နှစ်ဦးနှင့် သက်တမ်းလွန်ဆေးဝါး သိုလှောင် ထားသူ တစ်ဦး စုစုပေါင်း ၁၄ ဦးအား ဖမ်းဆီးခဲ့ပြီး ဥပဒေနှင့်အညီ ထိုက်သင့်သော ပြစ်ဒဏ်များပေးနိုင်ရန်အတွက် ဆက်လက်အရေးယူသွားမည်ဖြစ်ကြောင်းနှင့် ပြည်သူလူထု၏ အကျိုးစီးပွားကို ကာကွယ်ရန်အတွက် ဆေးဝါးအတု ပြုလုပ်ဖြန့်ဖြူးရောင်းချနေသူများကို အမြစ်ပြတ်ချေမှုန်း တိုက်ဖျက်သွားမည်ဖြစ်ကြောင်း၊ ယင်းအပြင် ဆေးဝါးအတုများကို တစ်ဆင့်ဝယ်ယူရောင်းချသူများကို မြေပြင်စစ်ဆေးဖော်ထုတ်အရေးယူသွားမည်ဖြစ်ကြောင်း သိရသည်။

၁၉၅၈ ခုနှစ်မှစ၍ နှစ်ပေါင်း ၆ဝ နီးပါးခန့်ရှိနေပြီဖြစ်သော စက်မှုဝန်ကြီး ဌာနကြီးကြပ်မှုအောက်ရှိ ဆေးဝါးစက်ရုံ(အင်းစိန်) ယခင် BPI စက်ရုံသည် ပြည်သူလူထုအတွက် ထိုးဆေး၊ သောက်ဆေးအမျိုးမျိုးနှင့် ပဋိဇီဝပိုးသတ်ဆေးများကို ထုတ်လုပ်လျက်ရှိပြီး ပြည်သူလူထုကို ကျန်းမာရေးစောင့်ရှောက်မှု ပိုမိုပေးနိုင်ရန် ဆေးဝါးအမယ်သစ်များ တိုးချဲ့ထုတ်လုပ်ရန်အတွက် New BPI Project ကို ၂ဝ၁၃ ခုနှစ်တွင် စတင်အကောင်အထည်ဖော်ခဲ့ရာ ၉၉ ရာခိုင်နှုန်းပြီးစီးနေပြီဖြစ်၍ မကြာမီ ဆေးအမယ်သစ်များ တိုးချဲ့ထုတ်လုပ်သွားနိုင်မည်ဖြစ်ကြောင်း သိရသည်။